මේ උදාවී ඇත්තේ සිහින දකින්නන්ගේ වසන්තයයි

බුලිත ප්රදීප් කුමා
දුරුතු මහේ දිවා කාලය බොහෝ උණුසුම්ය. දහවල් හිරු එළිය දැඩිය, තියුණුය, කටුකය, කර්කශය..දහවල කොතරම් උණුසුම් වුවත් දුරුතු මහේ රාත්රිය නම් ශීතල අධිකය. රාත්රියේ අලුයම් කාලය තුළත් උදේ පාන්දරත් දැනෙන මේ අධික ශීතල නිසා බොහෝ දෙනකු දුරුතු මාසය හඳුන්වන්නේ ශීතල දුරුත්ත කියාය...ශීතල දුරුත්ත සිහින දකින්නන්ගේ මාසයයි. රාත්රි කාලයේ ශීතල නිසා රාත්රියේ පටන් පාන්දර හත අට වනතුරු එක දිගට යන දිගු නින්ද තුළ එක සිහිනයක් නොව, සිහින දෙක තුන නොදකිනා කෙනකු නැති තරම් ය.

මේ ශීතල දුරුත්තට චන්දදාස වඩාත් කැමැති වූයේද මේ සිහින නිසාය. ඔහු දකින නානා ප්රකාර සිහින වලින් මිදී පියවි ලොවට පිවිසෙනවාට වඩා අවාසනාවක් නැතැයි විටෙක ඔහුට හිතෙන්නේ ශීතලේ දකින සිහිනවල ඇති මිහිරියාව නිසාමය.
විටෙක සුරංගනා ලෝකයේ සුරවමියන් සමග එකට එකතු වී සිහිනෙන් "ඩාන්සින් ස්ටාර්" බලන චන්දදාස තවත් විටෙක දකින්නේ සුරූපී උතුරු ඉන්දීය නිළියන් පිරිසකට මැදිව පබා ටෙලිනාට්යය බලන සිහිනයකි. තවත් විටෙක ඔහු සිහිනෙන් සිටින්නේ ඉන්දියාවේ සචින් ටෙන්ඩුල්කාර් සමග මහ හෝටලයක රාත්රි භෝජන සංග්රහයක් ගනිමිනි. සුපිරි භාරතීය නිළි කරීනා කපූර් ඔහු උරහිසේ නිකට තබාගෙන හිසෙහි කෙහෙරැලි අතර ඇඟිළි තුඩු යවමින් සියුම් ලෙස ඔහුගේ හිස පිරිමදිමින් සිටියාය.
මේ සොඳුරු සුවබර සිහින අතර පසුගිය දිනක චන්දදාස එකම රාත්රියකදී හරි අපූරු සිහින හතක්ම දුටුවේය. ඊට පසුදාම මා හමුවන්නට ආ චන්දදාස ඒ අරුම පුදුම සිහින හත මා හමුවේ විස්තර කළේ මෙසේය.
පුදුමයට කාරණය මේ සිහින හතම වෙනදාට ඔහු දකිනවාට වඩා වෙනස් දේශපාලන සිහින වීමය.
පළමු සිහිනය දුටුවේ රාත්රි 12.00 පසුවනවාත් සමගය. ඉතාම සාමකාමී සර්ව සාධාරණ මැතිවරණයකින් හිටපු ජනාධිපති මහින්ද පරදා ඉතා විශිෂ්ට ජයක් ජෙනරාල් සරත් ෆොන්සේකා අත්පත් කරගන්නා ආකාරය ඔහු දුටුවේය.
රටේ ජනතාව ජයග්රහණයෙන් ඔද වැඩී ප්රීති ඝෝෂා නඟමින් ජෙනරාල් ජනාධිපති වීමේ ජය සමරන්නට වූ අතර ඉන් එක් පිරිසක් කඩු පොලු අතැතිව විරුද්ධවාදීන්ට පහර දෙන්නට සූදානම් වන්නට වූහ. එය දුටු ජෙනරාල්...
විරුද්ධවාදීන්ට තබා කලවැද්දෙකුට වත් හිරිහැරයක් කරන්න එපා.... ජෙනරාල් කීවේය. පිරිස කඩුපොලු බිම දමා ලඡ්ජාවෙන් බිම බලා ගත්හ...
පාරවල් මැද ලිප් බැඳ ජනතාව කිරිබත් උයන්නට වූහ. උයන ලද කිරිබත් පිඟන්වලට දමාගත් ෆොන්සේකා පාක්ෂිකයෝ ඒවා ගෙනගොස් මහින්ද පාක්ෂිකයන්ට බෙදන්නට වූහ. කවුරුත් සතුටින් ඉපිළ ගියහ. රටේ ජනතාව අතර වාද භේද නැත. ප්රශ්න නැත.
ජයග්රහණයෙන් උද්දාමයට පත්වූ රනිල්, සෝමවංශ, රවී, අනුර ඇතුළු පිරිස පිටුපස විවෘත ට්රක් රථයක නැඟී ජනතාව කාබී ප්රීති වන අයුරු බලමින් රවුමක් යන්නට වූහ...
දැන් කවද්ද ඔයා විධායක බලය අහෝසි කරල මාව විධායක අගමැති කරන්නේ... රනිල් නොඉවසිල්ලෙන් අසා සිටියේය.
ඉක්මනටම... ඉක්මනටම... මම විධායක බලය තියාගෙන කරන්න ඕන වැඩ කීපයක් තියනවා. ඒ ටික කරපු වහාම මේක ඔයාට දීල මම නාමමාත්ර විධායකයා වෙනවා. එතකොට හොඳයිනේ...
රනිල් අහිංසක ලෙස ජෙනරාල් දෙස බලා ඉතා යටහත් පහත් සිනහවක් පෑවේය.
ඒත් සමගම චන්දදාස ඒ සිහිනයෙන් මිදී ඉවතට ආවේය...
චන්දදාස දෙවැනි සිහිනය දුටුවේ ඊට සුළු මොහොතකට පසුවය.
කොළඹ බණ්ඩාරනායක සමරු ශාලා පරිශ්රයේ ඒ කමිටු ශාලාව පිරී ඉතිරී යන තරමට මාධ්යවේදීහු රැස්ව සිටියහ. ඔවුහු පුල පුලා බලා සිටියේ ජනාධිපතිවරණයෙන් විශිෂ්ට ජයක් ගත් ජෙනරාල් සරත් ෆොන්සේකා සිය පළමු පුවත්පත් සාකච්ඡාව සඳහා පැමිණෙන තුරුය. ඒ පුවත්පත් සාකච්ඡාවට මෙතෙක් කලක් මහින්ද ආණ්ඩුවට බියේ විදෙස් ගතව සැඟව සිටි මාධ්ය ලෝකයේ දැවැන්තයෝ කිහිප දෙනකුද පිටරට සිට පැමිණීම විශේෂත්වයක් වූහ. සුනන්ද දේශප්රිය, සනත් බාලසූරිය, පෝද්දල ජයන්ත, උවිදු කුරුකුලසූරිය පමණක් නොව එකල කොටි මාධ්යවේදිනියකැයි හංවඩු ගැසූ තංගරාසා පරමේශ්වරීද පැමිණ සිටියහ. තිස්සනායගම් ද සිටියේය. චන්දදාස ද සිටියේ මාධ්යවේදියකු ලෙස ය.
ජෙනරාල් ෆොන්සේකා, රනිල්, සෝමවංශ, අනුරකුමාර, හකීම් ඇතුළු පිරිස එන විට මාධ්යවේදීහු සියලුම දෙනා නැඟීසිටියහ. ජෙනරාල් සභාවට පැමිණි වහාම පළමුව කළේ සුනන්දට, පෝද්දලට, සනත්ට තිස්සනායගම්ට හා පරමේෂ්වරීට මාධ්ය නිදහස සමරමින් මල්දම් පළඳවා පිළිගැනීමය.
මාධ්ය සාකච්ඡාව ඉන් පසුව ඇරැඹිණි. ආරම්භයේදීම ජෙනරාල් තුන්හුලස් නාලිකාවේ ප්රධානියාට හා ලංකා ඊ. නිවුස් කර්තෘවරයාට තමන් ජනාධිපති කරවීමට වෙහෙසීම වෙනුවෙන් වෙන වෙනම සම්මාන දෙකක් පිරිනැමුවේය. ජයග්රහණයේ පෙරගමන්කරුවෝ නමින් එA සම්මාන නම් කර තිබිණි.
ඔබ විධායක ජනාධිපති ක්රමය අහෝසි කරන්නම ඕන කියල හිතනවද... මරික්කාර් ඇසුවේය.
ඒ ගැන තවම හිතල නැහැ. දේශපාලනය ගැන දැනුම් තේරුම් තියන අයගෙන් අහල තීරණයක් ගන්නම්. ෆොන්සේකා කීවේය.
රාජපක්ෂවරුන්ට මොකද කරන්නේ... නඩු දාන්නේ නැද්ද...
ඒක ගැන ජාත්යන්තරය බලාගනීවි..
එතකොට අර ශවින්ද්ර සිල්වා...
එයා ගැනත් ජාත්යන්තරය බලා ගනීවි.
ලේක් හවුස් පත්තර ඔබතුමාට හරියට මඩ ගැහුවා. රටේම ඉන්න කලාකාරයෝ ඔබට විරුද්ධවී වේදිකාවට නැග්ගා. ආණ්ඩුවේ රූපවාහිනි චැනල් නිසි බලධාරියාගේ කීම වත් නාහ මහින්දට කඩේ ගියා. මේවාට පාඩමක් උගන්නන්නේ නැද්ද... මාධ්යවේදීහු ඇසූහ.
මොකද නැත්තේ. මම හොඳ පාඩමක් උගන්වනවා. රූපවාහිනියයි අයිටීඑන් එකයි තහනම් කරනවා. ලේක්හවුසිය වහනවා. සිරස ජාතියේ එකම නාලිකාව කරනවා. හඩ්සන්වයි ලලිත් සිල්වාවයි මහින්ද අබේසුන්දරවයි මුරුසි දිවයිනට පිටුවහල් කරනවා. ඊට පස්සේ කලාකරුවන්ට පාඩමක් උගන්නන්න චිත්රපට ටෙලිනාට්ය නාට්ය හදන එකයි රඟපාන එකයි සින්දු කියන එකයි මියුසික් කරන එකයි රටේ තහනම් කරනවා. එතකොට උන්ට තේරෙයි මම කවුද කියලා...
ඒ ප්රකාශයෙන් උඩ බිම නැතුව චන්දදාස අවදි වුණේය. ඉන් පසු ඔහු තුන්වැනි හීනය දුටුවේ අලුයම 1.00 ට පමණය.
හීනයේ පෙනුනේ කොළඹ වරාය අතුළත දර්ශනයකි. දෑත් පිටිතල හයා බැඳ දමන ලද ටයිකාරයෝ පෝලිමක් බිමට බර කරගත් හිසින් යුතුව ගාටමින් ගාටමින් ගමන්කර අලස විලාසයකින් නැවකට ගොඩවන අයුරු චන්දදාස දුටුවේය. ෆොන්සේකා මහත් ආඩම්බර ලීලාවෙන් ඔවුන් දෙස බලා සිටියේය.
කවුද ඒ... කොහේද එයාලව යවන්නේ...
මුන්ට තමයි මේ රටේ ආර්ථික විශේෂඥයෝ කියල කියන්නේ. මුන් ටික ඉන්නකන් මේ රට දියුණු කරන්න බැහැ. සේවකයන්ගේ පඩි වැඩි කරන්න බැහැ. මම මුංව නැවක දාල පා කරල හරිනවා මූදේ... අර විජය කුමාරයාට කළා වගේ.. ජෙනරාල් උත්තර දුන්නේය.
මෙයාල පැන්නුවාට පස්සේ රජයේ සේවක වැටුප 10,000 කරන්න පුළුවන් වේවිද...
මොකද බැරි. සල්ලි ගහන මැෂිමට කොළ දානවා. තීන්ත දානවා. සල්ලි අච්චු ගහනවා. බෙදනවා එච්චරනේ...
එතකොට උද්දමනය වැඩි වෙනවනේ සර්... චන්දදාස කීවේය.
උඹත් එනවද පණ්ඩිත වචන කියල අර ආර්ථික විශේෂඥයෝ වගේ වෙන්න. දානවා බලාගනින් කලවැද්දව ඇදල අර නැවටම මෙහෙන් තොලොංචි වෙලා යන්න.
ඉන් උඩ ගොස් බිම වැටී ඇහැ ඇරුණු චන්දදාස හතරවැනි හීනය දුටුවේ ඊට විනාඩි කිහිපයකට පසුවය. ඉන් ඔහු දුටුවේ ස්වයං නිර්ණ අයිතිය දිනාගෙන නිදහස් වුණු උතුර නැගෙනහිර ජනතාවය.
උතුරේ හා නැගෙනහිර හැම හන්දියක් හන්දියක් පාසාම තිබුණේ ප්රභාකරන් හා ෆොන්සේකා එකට සිට කරට අතදාගෙන සිටින පිළිරූ ය. උතුරේ හා නැගෙනහිර දෙමළ, මුස්ලිම් ජනතාව එකට එකතුව මේ පිළිම දෙකට පහන් හඳුන්කූරු පත්තු කරන්නට වූහ.
අලුයම 2.30 ට පමණ චන්දදාස පස්වැනි සිහිනය ද දුටුවේය.
ෆොන්සේකා ජනාධිපති වීමෙන් අනතුරුව රටේ බඩු මිල ශීඝ්රයෙන් පහත වැටෙන අයුරු චන්දදාස ඉන් දුටුවේය. මෙතෙක් දිනක් සහල් සඟවාගෙන සිටි වෙළෙන්දෝ සිය සියලුම සහල් තොග එළියට දමන්නට වූහ. සුදු හාල් මිල නැවතත් රු. 40 ට අඩු විය. සම්බා කිලෝව 50 ට වැටිණි. සැමන් 80 ට ගියේය. පරිප්පු 70 ට ගියේය. සීනි 60 ට ගියේය. මෙතෙක් දිනක් ගෑස් උස්සාගෙන සිටි ගෑස්කාරයෝද ගෑස් මිල තව රුපියල් 500 කින් අඩු කළහ. පෙට්රල් හා ඩීසල් වලට රජය අය කරන බද්ද ඉවත් කර ඒ සහනයද ජනතාවට දෙනු ලැබූහ. රජයේ සේවකයෝ රු. 10,000 න් වැඩි වූ පඩිපත් රැගෙන ගෙවල්වලට බඩුමුට්ටු රැගෙන ආඩම්බරයෙන් ගෙදර යන අයුරු චන්දදාස දැක බලා ගත්තේය.
මෙය නම් හරි පුදුමාකාරම රටකි. චන්දදාස ඒ සිහිනයෙන් ද අවදි වූයේය.
චන්දදාස ඊටත් පසුව දුටුවේ මහ පුදුමාකාර සිහිනයකි. මුලින්ම දුටුවේ අහසේ කළුම කළු පාට වළාකුලකි. චන්දදාස ඒ වළාකුල තුළ කුමක්දෝ අමුත්තක් දැක ඒ දෙස බලා සිටියේය. වළාකුලක් කියලද හිතේ... නැහැ. ඔය යන්නේ රටේම ඉන්න මදුරුවෝ.. පුදුමයි නේද.. ජෙනරාල් කීය.
ඔව්... ඇත්තට මේ කට්ටිය එකතුවෙලා කොහේද යන්නේ...
රට අතහැරල යනවා. මීට පස්සේ ඔය ඩෙංගුයි, බරවයි, මැලේරියාවයි වගේ වසංගත එකක්වත් රටේ නැහැ... ජෙනරාල් සිය අලංකාර දත් දෙපෙළ පෙන්වමින් ආඩම්බර ලෙස සිනහසුනේය.
එතකොට අර මීයෝ ටික කාණුවල පේළියට ඇදිල යන්නෙ කොහේද.
උන් කාණු දිගේ ගිහිල්ල කැලණි ගඟට පැනල දිවි හානිකර ගන්නවා. එතකොට මේ රටෙන් මී උණ ඉවරයි. ඌරෝ ටික පේළි ගැහිල මීගමුවට ගිහින් මීගමුවෙන් මුදට පනිනවා. ඊට පස්සේ ඌරු උණ ඉවරයි. කුකුලෝ ටික නොකා නොබී ඉඳල දිවි හානිකර ගන්නවා. එතකොට කුරුළු උණත් ඉවරයි.
චන්දදාස එවර අවදි වූයේ පුදුමය ඉවසාගත නොහැකිවය.
ඉන් පසු ඔහු අවසාන සිහිනය වන හත්වැනි සිහිනය දුටුවේය.
එය එක්තරා උත්සවයකි. ඒ වන විට මහ මැතිවරණය ද පවත්වා ප්රතිඵල ද නිකුත් කොට තිබිණි. හංසයා ලකුණෙන් තරග වැදි කණ්ඩායමේ නායකයා ලෙස රනිල් නව ආණ්ඩුවක් පිහිටුවා එහි අගමැතිව සිටියේය. උත්සවය පැවැත් වුණේ පරණ පාර්ලිමේන්තු ගොඩනැඟිල්ලේ පිහිටි ජනාධිපති කාර්යාලය ඉදිරිපිටය. උත්සවය පැවැත් වූයේ ජනාධිපති ජෙනරාල් සිය විධායක බලතල අගමැති රනිල්ට පවරාදීම සඳහාය.
උත්සවය ඇරැඹීමට පෙර සරත් ෆොන්සේකා ගොස් සිය ලේකම් කාර්යාලය ඉදිරිපිට ජාතික වීරයන්ගේ පිළිරූ අතර අලුතින් ඉදිකර තිබූ පිළිරුවක් නිරාවරණය කළේය. අනතුරුව ඊට මල්දමක් පළඳවා ආචාරයක් ද පුද කළේය..
ඒ පිළිරුව බොහෝ දෙනකු හඳුනා ගත්තේ මොහොතකට පසුවය. එය පුදුමයට කාරණයක් වූයේ ප්රභාකරන්ගේ පිළිරුවක් වීම නිසාය.
ඇයි සර්... මෙයා ත්රස්තවාදී නායකයෙක්නේ. අපේ ජාතික නායකයෝ කීදෙනෙක්ව මෙයා මැරුවද මෙයාට කොහොමද අපි ජාතික වීරයෙක් කියල පිළිගන්නේ.
එහෙම කියන්න එපා. මෙයා මට මෙතෙන්ට එන්න හුඟක් උදව් කළා. ඒ උදව්වම මදි ද ජාතික වීරයෙක් වෙන්න.
කොහොමද එහෙම වෙන්නේ.
එහෙම වෙන්නෙද එහෙම වෙන්නේ මෙහෙමයි.
මෙයා ත්රස්තවාදී නායකයෙක් නිසා තමයි රටේ යුද්ධයක් ඇති වුණේ. යුද්ධය නිසා තමයි මම කරලියට එන්නේ. මෙයාව මරපු හින්ද තමයි අපි යුද වීරයෝ වෙන්නේ. යුද වීරයෝ නිසා තමයි ජනතාව අපිට ඡන්දේ දෙන්නේ. ඉතින් දෙයියනේ මෙයා නැත්නම් මම කොහොමද මේ රටේ ජනාධිපති වෙන්නේ. මගෙ දෙයියා... කියමින් ජෙනරාල් ෆොන්සේකා පිළිරුව ඉඹගෙන ඉඹගෙන ගියේය.
චන්දදාස සිය සිහින හත මා ඉදිරියේ විස්තර කර කීවේ එසේය.